ന്യൂഡൽഹി: വിവാഹവീട്ടിലെ തിരക്കിനിടയിൽ ഓൺലൈൻ ഡെലിവറി ഏജന്റിന് വ്യത്യസ്തമായ രീതിയിൽ പണം നൽകിയ ഒരു കുടുംബത്തിന്റെ വീഡിയോ സോഷ്യൽ മീഡിയയിൽ തരംഗമാകുന്നു. ഗ്രോസറി സാധനങ്ങൾ എത്തിച്ചുനൽകിയ ബ്ലിങ്കിറ്റ് ഏജന്റിനെ നോട്ടുമാല അണിയിച്ചാണ് വീട്ടുകാർ സ്വീകരിച്ചത്. ഭവ്യ ശ്രീധർ എന്ന യുവതി ഇൻസ്റ്റാഗ്രാമിലൂടെ പങ്കുവെച്ച വീഡിയോ ഇതിനോടകം ലക്ഷക്കണക്കിന് ആളുകൾ കണ്ടുകഴിഞ്ഞു.
വീട്ടിൽ വിവാഹ ആഘോഷങ്ങൾ പൊടിപൊടിക്കുന്നതിനിടയിലാണ് ഏകദേശം 2,000 രൂപയുടെ സാധനങ്ങൾ ഇവർ ഓൺലൈനായി ഓർഡർ ചെയ്തത്. സാധനങ്ങളുമായി എത്തിയ ഡെലിവറി ഏജന്റ് പണം ചോദിച്ചപ്പോൾ കയ്യിൽ ചില്ലറ നോട്ടുകൾ ഇല്ലാതിരുന്നതിനാലാണ് വീട്ടുകാർ ഈ വിചിത്രമായ വഴി തിരഞ്ഞെടുത്തത്. വിവാഹ ചടങ്ങുകൾക്കായി കരുതിയിരുന്ന 2,100 രൂപയുടെ നോട്ടുകൾ കോർത്ത മാല തന്നെ അവർ ഏജന്റിനെ അണിയിക്കുകയായിരുന്നു. അപ്രതീക്ഷിതമായി ലഭിച്ച ഈ സ്വീകരണം ചിരിച്ചുകൊണ്ടാണ് ഡെലിവറി ബോയ് സ്വീകരിച്ചത്.
“ഞങ്ങൾ വിവാഹത്തിന്റെ തിരക്കിലാണ്, അതുകൊണ്ട് ഈ മാലയിലെ നോട്ടുകൾ താങ്കൾ തന്നെ അഴിച്ചെടുക്കണം” എന്ന് കുടുംബാംഗങ്ങൾ തമാശരൂപേണ പറയുന്നത് വീഡിയോയിൽ കേൾക്കാം. ഓർഡർ തുകയേക്കാൾ 100 രൂപ അധികമുള്ള മാലയാണ് ഇദ്ദേഹത്തിന് നൽകിയത്. “ബ്ലിങ്കിറ്റ് ഏജന്റ് വിവാഹവീട്ടിൽ സാധനങ്ങൾ എത്തിക്കുമ്പോൾ” എന്ന അടിക്കുറിപ്പോടെയാണ് വീഡിയോ പ്രചരിക്കുന്നത്.
ഇന്ത്യയിൽ മാത്രമേ ഇത്തരമൊരു കാഴ്ച സാധ്യമാകൂ എന്നാണ് വീഡിയോയ്ക്ക് താഴെ വരുന്ന കമന്റുകൾ. സാധനങ്ങൾ നൽകാൻ വന്നയാൾ മടങ്ങുന്നത് വരന്റെ അടുത്ത സുഹൃത്തിനെപ്പോലെയാണെന്നും നോട്ടുകൾ ഓരോന്നായി അഴിച്ചെടുക്കുന്ന കഷ്ടപ്പാടിനുള്ള കൂലിയാണ് അധികം നൽകിയ 100 രൂപയെന്നും സോഷ്യൽ മീഡിയ ഉപയോക്താക്കൾ രസകരമായി കുറിക്കുന്നു.
